Austurlensk kókoskjúklingasúpa

Austurlensk kókoskjúklingasúpa

Súpur eru alltaf ljúfar og gott að gera svolítið magn af þeim til að eiga afgang daginn eftir. Súpur bragðst nefnilega oft svo vel daginn eftir. Ég geri oft súpu að kvöldi til sem ég hef svo í matinn daginn eftir sem er svo yndislegt því þá þarf ég ekki að gera annað en að hita súpuna upp og kaupa eða baka gott brauð með. Matartíminn verður ekki einfaldari. Þessi súpa er bragðmikil og fersk í senn og ég get borðað endalaust af henni. Það eru örugglega að verða 10 ár síðan ég gerði hana fyrst og hún er reglulega á mínum borðum.

 

3 kjúklingabringur
1 rauð paprika
1 gul paprika
1 cm engifer
2 hvítlauksrif
2 msk karrý
1 msk kóríander duft
2 dósir kókosmjólk
3 msk tómatpúreé
1 hnefi ferskt kóríander
2 vorlaukar
1/2 rauður chilli
1/2 pakki eggjanúðlur
2 kjúklingateningar
salt og pipar(eftir smekk)
1-2 msk hnetusmjör(ef vill)

Skerið kjúklinginn í bita.  Skerið paprikuna, vorlaukana og chilli í bita.  Pressið hvítlaukinn og rífið engiferið, saxið niður ferska kóríanderið.  Steikið kjúklinginn, paprikuna,chilli, hvítlaukinn, karrýið, kóríander og engiferið saman í potti.. bætið tómatpureé saman við og steikið þar til kjúklingurinn er tilbúinn eða hvítur og steiktur í gegn.  Hellið kókosmjólkinni yfir og látið suðuna koma upp.
Látið sjóða í 10 mínútur, smakkið til og kryddið með salti og pipar og jafnvel smá chillidufti ef maður vill hafa súpuna bragðmeiri. Það er líka gott að nota hálfan pakka af eggjanúðlum og sjóða þær í vatni áður en þær eru settar út í súpuna.
Að lokum set ég tvo teningum af kjúklingakrafti út í.
Það er best að gera þessa súpu deginum áður þvíþá nær hún fullkomna bragðinu eins og er með flestar súpur. Svo er gott að bæta fersku kóríander út á rétt áður en hún er borin fram.

Verði ykkur að góðu, Lólý – loly.is

Deila þessari færslu:

Auglýsing / MLH

Nýjustu fréttir

Hvað viltu finna?

Sjá allar niðurstöður