Brautskráning frá Flensborg

Brautskráning frá Flensborg

Allir nýnemar skráðir á þriggja ára brautir

Flensborgarskólinn brautskráði 72 nemendur á dögunum. Í útskriftarhópnun voru 46 karlar og 26 konur. Á Félagsfræðibraut voru 31, þar af tíu á íþróttaafrekssviði. Málabrautarnemendur voru tveir og nemendur af náttúrufræðibraut 20, þar af 5 af íþróttaafrekssviði. Starfsbrautarnemendur voru fjórir að þessu sinni og nemendur á viðskipta- og hagfræðibraut tólf, þar af tveir af íþróttaafrekssviði. Tveir luku viðbótarnámi til stúdentsprófs.

 

Alls voru því sautján nemendur af íþróttaafrekssviði útskrifaðir, þar af voru einstaklingar nýorðnir Íslandsmeistarar. Við útskriftarathöfnina var því jafnframt fagnað að 40 ár eru liðin frá því fyrstu stúdentarnir voru útskrifaðir frá skólanum. Dúxinn á þessu vori var Lena Dís Traustadóttir af málabraut.

Námsframboð tekur breytingum

Línur eru að skýrast í námsframboði Flensborgarskólans fyrir næsta skólaár. Líkt og allir vita, tekur skólinn upp nýja námskrá í haust. Nýnemar verða innritaðir á þriggja ára brautir. Brautirnar eru lagðar út frá æskilegum inntökuviðmiðum háskólanna og er lögð áhersla á að námið í Flensborg verði mjög góður undirbúningur undir háskólanám.

Svigrúm er þó áfram til staðar til ljúka á lengri og jafnvel styttri tíma. Þau Hildur Einarsdóttir og Þorbjörn Rúnarsson mynda stýrihóp skólans um nýja námskrá. Þorbjörn segir að námsbrautirnar verði fimm í stað fjögurra og þó þær virðist keimlíkar þá bjóði þær allt aðra möguleika en áður var. „Það er skilgreindur kjarni sem allir taka á hverri braut en síðan velja nemendur úr séráföngum hverrar brautar. Þar verða íþm tvöfalt fleiri áfangar í boði en þarf að velja og þess vegna hafi nemendur gott svigrúm til að velja sér þá samsetningu sem háskólar heima og erlendis gera kröfur um.“

Ein helsta nýjungin er hin svokallaða opna braut, þar sem nemendur geta raðað saman námi úr öllum áföngum skólans og eru ekki bundnir séráföngum ákveðinnar brautar. Þannig geta þeir undirbúið sig t.d. fyrir þverfaglegt háskólanám. „Núna hafa háskólar sett fram námskröfur með mun markvissari hætti og því auðveldara að leiðbeina nemendum, auk þess sem þau ættu að geta kafað dýpra i færri greinar. Við leggjum áherslu á dýptina í náminu,“ segir Þorbjörn.

En hvað með Íþróttaafrekssvið skólans, sem er það stærsta á landinu. Breytir þetta því ekki?

Hildur segir það ekki vera. „Það verður vitaskuld áfram, enda hefur samstarfið við íþróttafélögin verið uppbyggilegt fyrir báða aðila. En við aðlögum það að nýju kerfi og bætum svo við listnámssviði í samstarfi við Tónlistarskóla Hafnarfjarðar. Það er spennandi valkostur. Einnig höldum við áfram með öflugt starf kórsins og samstarfi við Gaflaraleikhúsið. Við bjuggum jafnframt til félagslífssvið þar sem nemendur geta fengið metið framlag sitt til félagsmála hér í skólanum en erum líka að skoða að meta sjálfboðastarf á ýmsum sviðum. Þetta er mjög spennandi. Við erum sannfærð um að samstarf af þessum toga, auk til dæmis þess samstarfs sem við höfum byggt upp með grunnskólunum og kallast Bæjarbrúin, bætir ekki bara stöðuna hér heldur gagnvart öllum nemendum úr Hafnarfirði sem hingað koma. Við viljum vinna með þessum aðilum hér í bænum.“

 

Deila þessari færslu:

Auglýsing / MLH

Nýjustu fréttir

Hvað viltu finna?

Sjá allar niðurstöður